Nang Ni-Yolanda ang Pinas

Nang nabuo ang Yolanda sa bandang Pacifico

Umabot ito hanggang kategoryang kwatro

Natakot ang mga Pilipino

Kaya pinaghandaan umano ang napakalakas na bagyo.

Nang dumating ang Nobyembre otso

Pinasok ni Yolanda ang ating teritoryo

Visayas kanyang binayo nang todo

Iilang oras sa iisang araw, hinatid ay delubyo.

Nang natapos ang malakas na ulan, hangin at daluyong

Maraming kapwa Pilipino ang sumigaw ng “Tulong!”

Walang ari-arian ang hindi nagkalatay

Libu-libong Pilipino ang nasugata’t nangamatay.

Nang naisiwalat ang tindi ng iniwan

Para kang nabasted nang walang katapusan

Ang sakit sa puso, kurot na kurot

Tutulo ang luha sa sobrang lungkot.

Nang narinig at nakita ang mga kwento

Aba! Nagtrend sa Twitter si Atom Araullo
Pati #RescuePH ay promoted

Parang nag-Yolanda ulit, ‘storm surge’ ng tulong ang hatid.

Nang nagtrend din ang #PrayForJustinBieber worldwide

Ang mga non-Bielibers hindi naghide

Bakit daw sumakit lang ang tiyan niya

#PrayForThePhilippines kinalimutan na.

Nang sumunod na mga araw

Mga bangkay at ‘zombies’ nagsilitaw

Buhay o patay, walang agarang tulong na natanggap

Mabagal na parang susô ang pag-usad.

Nang wala pa ring makain, mainom at matulugan

Ang lungkot ay napalitan ng inis at pagtataka sa mga kinauukulan

Bakit ang tagal? Bakit ang bagal? Bakit ang garapal?

Bilisan po naman! Huwag na po kasing ipalagay ang mukha sa trapal.

Nang si Yolanda’y naglaho

Muling nabuhay si Poncio Pilato

Sabon nang sabon, hugas nang hugas

Ng kamay na makapagturo’y wagas na wagas.

Nang nanalo si Ariella sa Miss U, suot niya’y dilaw
Simbolo raw na pagkatapos ng bagyo’y muling aaraw

Sa tuwing dadalaw, dilaw ang kadalasang suot ng ating pangulo

Curious lang po. Bakit kaya? Ano po kayang sinisimbolo?

Nang nasalanta ang mga kayumanggi

Sinamahan tayo ng mga manilaw-nilaw, itim at puti

Walang amoy, walang wika, walang kulay

Meron o wala, umaalalay.

Nang nawasak ang halos buong Kabisayaan

Nabuo ang mga bansang nagbabanggaan

Taiwan, HK at China, tayo’y dinamayan

Isinantabi ang ngitngit kahit sandali lamang.

Nang si Anderson Cooper ng CNN ay nagbalita

Marami yatang Pilipinong naasar sa kanya

Mali-mali raw kasi siya

Ika nga, “Truth hurts” lalo na kapag galing sa banyagang dila.

Nang nasangkot naman ang nananahimik na relihiyon

Ang Roman Catholic at Iglesia ni Cristo nagkatensyon

Dahil sa litrato at FB account na ‘di mo alam kung totoo

“Hahaha. Tagumpay!” Sabi ng gumawa nito.

Nang ni-Yolanda ang Pinas

Naganap ang lahat ng nasa taas.

Maraming namatay, pero may mga nabuhay (pag-ibig, pagmamalasakit at pagkakaisa)

Maraming nawasak, pero may mga nabuo (buong mundo)

Maraming tumangis, pero may mga lumigaya (sa pagkakawanggawa)

Maraming umalis, pero may mga dumating (na siksik, liglig at umaapaw na biyaya)

Maraming naglaho, pero may mga lumitaw (na nakatagong kabutihang loob)

May nasaktan, pero may nakapanakit (katotohanan na may pagkukulang)

Marami.

Marami pang ‘Yolandang’ darating panigurado

Sana naman may napulot tayong mga aral dito

Sana wala ng kailangang mamatay bago may mabuhay;

        wala ng kailangang mawasak bago may mabuo;

        wala ng kailangang tumangis bago may lumigaya;

        wala ng kailangang umalis bago may dumating;

        wala ng kailangang maglaho bago may lumitaw;

        wala ng kailangang masaktan at makapanakit;

        wala ng kailangang bagyo bago maipakita ang     

                    ngiting Pilipino.

Para sa mga tumulong, tumutulong at tutulong sa aking sinisintang bansa,

Maraming, maraming salamat po!

sinulat ni: loveluytakyo

Nob 19, 2013