Tula-tulaan, Sana Tamaan

Lunes, araw pagkatapos ng aking kaarawan

FX ang aking sinakyan

Nag-isip, nagtanong, "Ano kaya'ng negosyo ang aking sisimulan?"

Walang naisip, napagod, aklat ang kinahantungan.

Sabi ko, "Gusto ko’ng mag-akda ng isang aklat."

Tanong ko, "Ano kaya’ng tema at pamagat?"

Tungkol sa narsing? sa pera? sa buhay? Basta huwag lang nobela

Ang daming naisip, nagkahalo-halo, pumasok si Napoles, sumunod ang baboy, nauwi sa baka.

Makisama sa rally? Naisip pero hindi ginawa

Magcomment sa Facebook? Nagpost na, ni-like pa

Gumawa ng artikulo? Maaari, pero nawalan ng gana

Tula kaya? Hindi alam ang panuntunan, pero ito binabasa mo na.

Isa itong tula-tulaan, walang sukat, linya o kung ano mang tawag ng mga pantas

Ang nais ko lang ay damdami'y mailabas

Ang pakay lang ay makibaka laban sa mga baboy

Kawawang baboy, nabababoy ng mga taong naging baboy. Paumanhin baboy.

Nang bumulong si Benhur Luy

Lumabas ang mga sandamakmak na babuy

Gaano ba kalakas ang bulong mo Kuya Luy?

Pati buwayang nasa lupa, kumaripas sa tubig para lumanguy!

Mali naman kasi ako, ang Filipino ng 'whistle blower' ay 'tagapito'

Ang 'whistle' ay ginamit bilang pangngalan, pandiwa ang unang naisip ko

Kaya pala malakas, marami tuloy ang nabuko

Pati sa mga wheelchairs, maraming mauupo.

Kawawang mga Pilipino, pinagloloko ng mga kapwa Pilipino

Simpleng Pilipino na umorder sa Jollibee ng value meal na paborito

Kinain, nabusog, dinumi, nagoyo

Ngayon, kakain ka pa ba sa Jollibee? Sagot ay itago.

"Hiyang-hiya naman ako sa inyo noh!", sabi ni Mr. Assimo

Daig mo pa’ng maghokus-pokus ang mga mahuhusay na madyikero

Hulaan ko pangarap mo noong biik ka pa,

Maging isang propesyonal na magnanakaw, tama ba?

Kailan ba mapapasô ang lisensya mo?

Sunôg na kaluluwa mo sa impyerno, pero hindi ka pa rin napapaso

Ano’ng paaralan mo? Panigurado hindi ako doon nag-aral

Sa angkan mo, hindi rin ako papakasal.

Hindi bale, bida-kontrabida ang papel ko

Kaya pagkatapos mo akong apihin, babangon ako!

Sa susunod na eleksyon, panigurado ikaw ay burado

Ligawan mo man ako, basted ka na friendzone ka pa! In short--- TALO!

Ang lupit mo, bilyon ang ninakaw mo

Ano’ng akala mo sa bilyon, piso?

Na kapag ninakaw mo ay walang magwawala?

Ngayon, sa’yo ang maraming mawawala.

Sana hindi ito tulad ng ibang isyu ng bayan

Una’y isang malakas na bomba na kinalauna’y naging bula na biglang naglaho

Sana mangibabaw ang katotohanan

Dahil kung hindi, burahin na sa diksyunaryo ang salitang ‘totoo’.

Hindi lang ako ang cowboy at cowgirl dito

Marami kaming makikibaka laban sa’yo

Kaya ikaw na baboy ka, magpakatao ka na

Sige ka, baka mahanginan ka.

Sana sa tula-tulaan kong ito ay tamaan ka

Para mabasag ka ng piggy bank ka

Sana hindi ka magbingi-bingihan at magbulag-bulagan sa aming hinihingi

Huwag kang mag-alala, ang mabuting pagbabago ay hindi pa naman huli.

Sulat ni: loveluytakyo

Sept. 16, 2013